kahin saza to kahin par jaza gulab ka phul

kahīñ sazā to kahīñ par jazā gulāb kā phuul

marīz-e-ḳhār kī kāmil davā gulāb kā phuul

kisī ke hijr kī kul dāstān hotā hai

kisī kī qabr pe ugtā huā gulāb kā phuul

kahīñ ġharīb ke bachche ko roTī mil na sakī

kahīñ vazīr pe pheñkā gayā gulāb kā phuul

jahāñ pe ishq-o-mohabbat sire se the hī nahīñ

vahāñ bhī ishq-o-mohabbat banā gulāb kā phuul

ḳhabar milī use jab mere lauT jaane kī

tab us ke haath se yak-dam girā gulāb kā phuul

phir us ne sahn meñ kīkar ugā liye qasdan

jab us ke sahn meñ na ug sakā gulāb kā phuul

furāt bhī thā vahīñ paas meñ magar afsos

balā-e-dasht meñ jaltā rahā gulāb kā phuul

shurūa din se maiñ be-zauq thā so maiñ ne 'alī'

kabhī diyā na kisī se liyā gulāb kā phuul

kahin saza to kahin par jaza gulab ka phul

mariz-e-KHar ki kaamil dawa gulab ka phul

kisi ke hijr ki kul dastan hota hai

kisi ki qabr pe ugta hua gulab ka phul

kahin gharib ke bachche ko roTi mil na saki

kahin wazir pe phenka gaya gulab ka phul

jahan pe ishq-o-mohabbat sire se the hi nahin

wahan bhi ishq-o-mohabbat bana gulab ka phul

KHabar mili use jab mere lauT jaane ki

tab us ke hath se yak-dam gira gulab ka phul

phir us ne sahn mein kikar uga liye qasdan

jab us ke sahn mein na ug saka gulab ka phul

furaat bhi tha wahin pas mein magar afsos

bala-e-dasht mein jalta raha gulab ka phul

shurua din se main be-zauq tha so main ne 'ali'

kabhi diya na kisi se liya gulab ka phul