kahin se bhi suKHan-e-moatabar nahin aata

kahīñ se bhī suḳhan-e-mo'atabar nahīñ aatā

nazar hameñ koī ahl-e-nazar nahīñ aatā

havā-e-dasht ye tāsīr-e-ḳhud-farāmoshī

bahut dinoñ se tasavvur meñ ghar nahīñ aatā

ajab shanāvar-e-bahr-e-vajūd haiñ ham bhī

hameñ zamān-o-makāñ kā safar nahīñ aatā

lahū se lafz kī taḳhlīq ham nahīñ karte

jabhī to apne bayāñ meñ asar nahīñ aatā

ye sochte haiñ ki manzil-rasī se kyā hāsil

jab apne saath koī ham-safar nahīñ aatā

ye arsa-gāh-e-talab qurbatoñ kī duniyā hai

yahāñ ham aisā koī be-hunar nahīñ aatā

darīche roz hī khulte haiñ band hote haiñ

magar vo chehra-e-rañgīñ nazar nahīñ aatā

hijāb kaun sā maan.e hai kuchh nahīñ ma.alūm

maiñ chāhtā huuñ vo aa.e magar nahīñ aatā

tilism-e-tīra-shabī 'lais' kis tarah TuuTe

koī bhī le ke payām-e-sahr nahīñ aatā

kahin se bhi suKHan-e-mo'atabar nahin aata

nazar hamein koi ahl-e-nazar nahin aata

hawa-e-dasht ye tasir-e-KHud-faramoshi

bahut dinon se tasawwur mein ghar nahin aata

ajab shanawar-e-bahr-e-wajud hain hum bhi

hamein zaman-o-makan ka safar nahin aata

lahu se lafz ki taKHliq hum nahin karte

jabhi to apne bayan mein asar nahin aata

ye sochte hain ki manzil-rasi se kya hasil

jab apne sath koi ham-safar nahin aata

ye arsa-gah-e-talab qurbaton ki duniya hai

yahan hum aisa koi be-hunar nahin aata

dariche roz hi khulte hain band hote hain

magar wo chehra-e-rangin nazar nahin aata

hijab kaun sa mane hai kuchh nahin malum

main chahta hun wo aae magar nahin aata

tilism-e-tira-shabi 'lais' kis tarah TuTe

koi bhi le ke payam-e-sahr nahin aata