kahin se ghair jo pahlu mein aae baiThe hain

kahīñ se ġhair jo pahlū meñ aa.e baiThe haiñ

isī liye vo hameñ yuuñ bhulā.e baiThe haiñ

zarā samajh ke karo ham se apne ġham kā bayāñ

ham ek umr ke sadme uThā.e baiThe haiñ

kabhī ḳhayāl meñ apne mujhe nahīñ laa.e

vo muddatoñ se mire dil meñ aa.e baiThe haiñ

kahāñ se loge vo sūrat vo kam-sinī kā jamāl

ham apne gosha-e-dil meñ chhupā.e baiThe haiñ

ḳhudā kā shukr hai un ko ḳhayāl to aayā

ki vo kisī kī nazar meñ samā.e baiThe haiñ

dharā hī kyā hai mohabbat meñ be-kasī ke sivā

ham apne aap muqaddar banā.e baiThe haiñ

nigāh-e-nāz ke tālib haiñ rahguzar meñ tirī

isī firāq meñ dhūnī ramā.e baiThe haiñ

kisī ko dekh liyā thā kahīñ pe nādāñ ne

tabhī se ḳhud ko ye hazrat lubhā.e baiThe haiñ

kahin se ghair jo pahlu mein aae baiThe hain

isi liye wo hamein yun bhulae baiThe hain

zara samajh ke karo hum se apne gham ka bayan

hum ek umr ke sadme uThae baiThe hain

kabhi KHayal mein apne mujhe nahin lae

wo muddaton se mere dil mein aae baiThe hain

kahan se loge wo surat wo kam-sini ka jamal

hum apne gosha-e-dil mein chhupae baiThe hain

KHuda ka shukr hai un ko KHayal to aaya

ki wo kisi ki nazar mein samae baiThe hain

dhara hi kya hai mohabbat mein be-kasi ke siwa

hum apne aap muqaddar banae baiThe hain

nigah-e-naz ke talib hain rahguzar mein teri

isi firaq mein dhuni ramae baiThe hain

kisi ko dekh liya tha kahin pe nadan ne

tabhi se KHud ko ye hazrat lubhae baiThe hain