kahin to intiha bhi ho kisi ke intizar ki

kahīñ to intihā bhī ho kisī ke intizār kī

jiyeñge aur kab talak ye zindagī udhār kī

milegī fat.h yā shikast vaqt hī batā.egā

maiñ laḌ rahā huuñ zindagī se jañg ār-pār kī

bhaTak rahe the muddatoñ se ham bhī jism-o-jāñ liye

use bhī ek umr se talāsh thī shikār kī

samajh sake na ham kabhī kisī kī be-yaqīniyāñ

bharī huī thī aañkh meñ to dhuul e'tibār kī

junūñ havā taḌap huī ḳhalish huī ki ġham huā

ye daulateñ haiñ ishq kī ye ne.amateñ hai pyaar kī

qadam mire jam hue haiñ ek hī maqām par

vo khīñch kar chalā gayā lakīr yuuñ hisār kī

use kisī kī tarah kyuuñ batā rahe ho ai 'pavan'

misāl DhūñDte ho kyuuñ ḳhudā ke shāhkār kī

kahin to intiha bhi ho kisi ke intizar ki

jiyenge aur kab talak ye zindagi udhaar ki

milegi fath ya shikast waqt hi bataega

main laD raha hun zindagi se jang aar-par ki

bhaTak rahe the muddaton se hum bhi jism-o-jaan liye

use bhi ek umr se talash thi shikar ki

samajh sake na hum kabhi kisi ki be-yaqiniyan

bhari hui thi aankh mein to dhul e'tibar ki

junun hawa taDap hui KHalish hui ki gham hua

ye daulaten hain ishq ki ye neamaten hai pyar ki

qadam mere jam hue hain ek hi maqam par

wo khinch kar chala gaya lakir yun hisar ki

use kisi ki tarah kyun bata rahe ho ai 'pawan'

misal DhunDte ho kyun KHuda ke shahkar ki