کہیے اب کس سے درد پنہانی

کہیے اب کس سے درد پنہانی

اک شب ہجر وہ بھی طولانی

ایک باقی رہے گی اس کی ذات

سارا عالم ہے آنی و فانی

جام جمشید بے حقیقت ہے

ساقیا دے شراب ریحانی

دل میں اس کی نہ ہوگی کیونکر چاہ

اس کا جلوہ ہے حسن کنعانی

دل کے آئینہ میں اسے دیکھا

بڑھ گئی اور میری حیرانی

وحدہ لا شریک لہ کے سوا

سجدہ کس کو کرے یہ پیشانی

وہ نگہبان اپنا ہے ہر دم

خوب اسے آتی ہے نگہبانی

اس کے دربار میں گزر کیا ہو

یہ فقیر اور بزم سلطانی

آتے آتے بہ مشکل آتی ہے

کوئی آساں نہیں زباں دانی

کیا کرے گا علاج اس کا مسیح

کیا سناؤں میں درد پنہانی

وہی مشکل کرے گا آساں شادؔ

شادمانی میں ہے سب آسانی