kahiye aisi baat jo dil mein laga de aag si

kahiye aisī baat jo dil meñ lagā de aag sī

kyā bhalā hogā kisī kā dāstān-e-tūr se

qaisar-o-askandar apnī qadrdānī kar ga.e

pūchh lete qīmat apnī kaash vo jamhūr se

kaifiyat nazāre kī hai fāsle par munhasir

kījiye nazāra kuchh nazdīk se kuchh duur se

duḳhtar-e-havvā se jo dekhā so dekhā dekhiye

rū-pazīr aḳhlāq kaise hoñ parī se huur se

kar sakā islāh-e-ālam kab koī jāda-numā

jo bhī tabdīlī huī millat ke nār-o-nūr se

kar gayā duniyā meñ bas vo inqalāb-añgez kaam

mil sakī fursat jise kuchh peT ke tanūr se

jaan bechāre ne dī duniyā ko pahuñchā ḳhaak faiz

aur bhī bigḌā zamāna da.ava-e-mansūr se

fā.eda insāf ke aa.iin se 'dīvāna' kyā

kuchh agar ummīd hai to rahm ke dastūr se

kahiye aisi baat jo dil mein laga de aag si

kya bhala hoga kisi ka dastan-e-tur se

qaisar-o-askandar apni qadrdani kar gae

puchh lete qimat apni kash wo jamhur se

kaifiyat nazare ki hai fasle par munhasir

kijiye nazara kuchh nazdik se kuchh dur se

duKHtar-e-hawwa se jo dekha so dekha dekhiye

ru-pazir aKHlaq kaise hon pari se hur se

kar saka islah-e-alam kab koi jada-numa

jo bhi tabdili hui millat ke nar-o-nur se

kar gaya duniya mein bas wo inqalab-angez kaam

mil saki fursat jise kuchh peT ke tanur se

jaan bechaare ne di duniya ko pahuncha KHak faiz

aur bhi bigDa zamana dawa-e-mansur se

faeda insaf ke aain se 'diwana' kya

kuchh agar ummid hai to rahm ke dastur se