kahiye kya aur faisle ki baat

kahiye kyā aur faisle kī baat

vasl hai ik muāmle kī baat

us ke kūche meñ laakh sar-gardāñ

ek yūsuf ke qāfile kī baat

gesū-e-hūr aur zāhid bas

zikr-e-kākul hai silsile kī baat

ġhair se ham ko rashk-e-sall-e-alā

kahiye kuchh apne hausle kī baat

ek aalam ko kar diyā pāmāl

ye bhī hai koī mashġhale kī baat

kyā bigaḌnā unheñ nahīñ aatā

sulh bhī hai mujādale kī baat

dekh kyā kahte haiñ ḳhudā se ham

ik zarā hai muqāble kī baat

is qadar aur qarīb-e-ḳhātir tū

aql se hai ye fāsle kī baat

dāvar-e-hashr se bhī haal kahā

nahīñ ruktī kahīñ gile kī baat

na chale paañv aur na sar hī chale

be-sar-o-pā hai aable kī baat

koī mazmūñ kabhī na pesh aayā

sher meñ kī hai phir sile kī baat

ham-nashīñ arsh hil gayā shab-e-hijr

pūchh mat jī ke zalzale kī baat

ai qalaq dil ko soch kar denā

kuchh nahīñ Thiik valvale kī baat

kahiye kya aur faisle ki baat

wasl hai ek muamle ki baat

us ke kuche mein lakh sar-gardan

ek yusuf ke qafile ki baat

gesu-e-hur aur zahid bas

zikr-e-kakul hai silsile ki baat

ghair se hum ko rashk-e-sall-e-ala

kahiye kuchh apne hausle ki baat

ek aalam ko kar diya pamal

ye bhi hai koi mashghale ki baat

kya bigaDna unhen nahin aata

sulh bhi hai mujadale ki baat

dekh kya kahte hain KHuda se hum

ek zara hai muqable ki baat

is qadar aur qarib-e-KHatir tu

aql se hai ye fasle ki baat

dawar-e-hashr se bhi haal kaha

nahin rukti kahin gile ki baat

na chale panw aur na sar hi chale

be-sar-o-pa hai aable ki baat

koi mazmun kabhi na pesh aaya

sher mein ki hai phir sile ki baat

ham-nashin arsh hil gaya shab-e-hijr

puchh mat ji ke zalzale ki baat

ai qalaq dil ko soch kar dena

kuchh nahin Thik walwale ki baat