kahkashan-e-gham se pur hai aasman-e-zindagi

kahkashān-e-ġham se pur hai āsmān-e-zindagī

aur zamīñ par har qadam hai imtihān-e-zindagī

kyā sunā.eñ aap ko ham dāstān-e-zindagī

ban gayā chehrā hamārā tarjumān-e-zindagī

jab tasavvur meñ tirā chehra nazar aane lagā

ho ga.ī rangīn-o-raushan dāstān-e-zindagī

kyā hameñ duniyā se shikva kyā shikāyat aap se

ban ga.e apne hī armāñ dushmanān-e-zindagī

jo vafā kī raah meñ qurbāniyāñ dete rahe

un se vābasta rahī duniyā meñ shān-e-zindagī

sar kaTā kar jiine vāloñ par hai nāzāñ kā.enāt

sar uThā kar kyā jiyeñge buzdilān-e-zindagī

the kabhī 'mashkūr' ham bhī raunaq-e-bazm-e-suḳhan

ham bhī shāmil the shumār-e-shā.irān-e-zindagī

kahkashan-e-gham se pur hai aasman-e-zindagi

aur zamin par har qadam hai imtihan-e-zindagi

kya sunaen aap ko hum dastan-e-zindagi

ban gaya chehra hamara tarjuman-e-zindagi

jab tasawwur mein tera chehra nazar aane laga

ho gai rangin-o-raushan dastan-e-zindagi

kya hamein duniya se shikwa kya shikayat aap se

ban gae apne hi arman dushmanan-e-zindagi

jo wafa ki rah mein qurbaniyan dete rahe

un se wabasta rahi duniya mein shan-e-zindagi

sar kaTa kar jine walon par hai nazan kaenat

sar uTha kar kya jiyenge buzdilan-e-zindagi

the kabhi 'mashkur' hum bhi raunaq-e-bazm-e-suKHan

hum bhi shamil the shumar-e-shairan-e-zindagi