kahkashan zer-e-gam kar lun kya

kahkashāñ zer-e-gām kar luuñ kyā

itnā ūñchā maqām kar luuñ kyā

raas aayā na ehtirām-e-sanam

apnā ḳhud ehtirām kar luuñ kyā

mah-o-ḳhurshīd kī tarah maiñ bhī

safar-e-nā-tamām kar luuñ kyā

ḳhidmat-e-ḳhvāhishāt kī ḳhātir

har-nafas ko ġhulām kar luuñ kyā

yās-o-hirmāñ kī zarb se Dar kar

apnā jiinā harām kar luuñ kyā

shukr bhūlūñ shikāyateñ sīkhūñ

zehniyat apnī ḳhaam kar luuñ kyā

āshiqāna namāz kī ḳhātir

apne dil ko imaam kar luuñ kyā

zindagī kī bahāreñ kyā kahne

aur kuchh din qiyām kar luuñ kyā

aa ga.ī sāmne shabīh-e-sanam

ai 'musavvir' salām kar luuñ kyā

kahkashan zer-e-gam kar lun kya

itna uncha maqam kar lun kya

ras aaya na ehtiram-e-sanam

apna KHud ehtiram kar lun kya

mah-o-KHurshid ki tarah main bhi

safar-e-na-tamam kar lun kya

KHidmat-e-KHwahishat ki KHatir

har-nafas ko ghulam kar lun kya

yas-o-hirman ki zarb se Dar kar

apna jina haram kar lun kya

shukr bhulun shikayaten sikhun

zehniyat apni KHam kar lun kya

aashiqana namaz ki KHatir

apne dil ko imam kar lun kya

zindagi ki bahaaren kya kahne

aur kuchh din qiyam kar lun kya

aa gai samne shabih-e-sanam

ai 'musawwir' salam kar lun kya