kahne ko yahan jine ka saman bahut hai

kahne ko yahāñ jiine kā sāmān bahut hai

ik tū jo nahīñ zindagī vīrān bahut hai

miltā hai sar-e-rāh to katrātā hai mujh se

ab apne kiye pe vo pashemān bahut hai

chehre ke ta.assur se to lagtā hai ki ḳhush hai

gar ruuh meñ jhāñko to pareshān bahut hai

pheñk aayā thā vo mujh ko kisī andhī guphā meñ

manzil pe mujhe pā ke vo hairān bahut hai

siitā hai agar tū tujhe paanā nahīñ mushkil

tere liye bas raam kā ik baan bahut hai

ik harf-e-mohabbat hī asāsa hai 'zafar' kā

arzāñ jo zamāne meñ mirī jaan bahut hai

kahne ko yahan jine ka saman bahut hai

ek tu jo nahin zindagi viran bahut hai

milta hai sar-e-rah to katraata hai mujh se

ab apne kiye pe wo pasheman bahut hai

chehre ke tassur se to lagta hai ki KHush hai

gar ruh mein jhanko to pareshan bahut hai

phenk aaya tha wo mujh ko kisi andhi gupha mein

manzil pe mujhe pa ke wo hairan bahut hai

sita hai agar tu tujhe pana nahin mushkil

tere liye bas ram ka ek ban bahut hai

ek harf-e-mohabbat hi asasa hai 'zafar' ka

arzan jo zamane mein meri jaan bahut hai