kahne ko yun to abr-e-karam qatra-zan hua

kahne ko yuuñ to abr-e-karam qatra-zan huā

vo gul khile nadīm ki ḳhūn-e-chaman huā

ye dāġh-e-dil ki jin se rivāj-e-sahar chalā

nok-e-mizha pe ashk jo ubhrā kiran huā

patthar kī mūrateñ nazar aatī haiñ chār-sū

yārab tire jahāñ ko ye kyā daf.atan huā

donoñ meñ gūñjtī haiñ bahāroñ kī dhaḌkaneñ

merī ġhazal huī ki tumhārā badan huā

donoñ se ho rahā hai na.ī sub.h kā zuhūr

terī qabā huī ki hamārā kafan huā

'tāhir' siyāh-fām hue ham to ġham nahīñ

raushan hamāre naam se nām-e-suḳhan huā

kahne ko yun to abr-e-karam qatra-zan hua

wo gul khile nadim ki KHun-e-chaman hua

ye dagh-e-dil ki jin se riwaj-e-sahar chala

nok-e-mizha pe ashk jo ubhra kiran hua

patthar ki muraten nazar aati hain chaar-su

yarab tere jahan ko ye kya dafatan hua

donon mein gunjti hain bahaaron ki dhaDkanen

meri ghazal hui ki tumhaara badan hua

donon se ho raha hai nai subh ka zuhur

teri qaba hui ki hamara kafan hua

'tahir' siyah-fam hue hum to gham nahin

raushan hamare nam se nam-e-suKHan hua