kaho dair-o-haram ya nam apna aastan rakh do

kaho dair-o-haram yā naam apnā āstāñ rakh do

sar-e-taslīm ḳham hai tum jahāñ chāho vahāñ rakh do

ghaTā kar qaid-e-āzādī baḌhā do ġham asīrī kā

qafas ko āshiyāñ meñ yā qafas meñ āshiyāñ rakh do

tasallī dene vaalo ham tahī-dastān-e-qismat haiñ

sar-e-dāman jo mumkin ho to dil kī dhajjiyāñ rakh do

zarūrat jaan kī dil ko maiñ be-parvā-e-hastī huuñ

jahāñ dil hai vahīñ ab merī jān-e-nā-tavāñ rakh do

ḳhudā kahlāo yā kuchh aur sab kuchh mujh ko kahnā hai

idhar aao mire muñh meñ tumhīñ apnī zabāñ rakh do

vafā kā raaz is majme.a meñ kholā jā nahīñ saktā

sivā mahshar ke koī aur roz-e-imtihāñ rakh do

mohabbat aur tasallī us pe hosh-e-zindagī 'kaifī'

nahīñ uThtā agar kāñdhe se ye bār-e-garāñ rakh do

kaho dair-o-haram ya nam apna aastan rakh do

sar-e-taslim KHam hai tum jahan chaho wahan rakh do

ghaTa kar qaid-e-azadi baDha do gham asiri ka

qafas ko aashiyan mein ya qafas mein aashiyan rakh do

tasalli dene walo hum tahi-dastan-e-qismat hain

sar-e-daman jo mumkin ho to dil ki dhajjiyan rakh do

zarurat jaan ki dil ko main be-parwa-e-hasti hun

jahan dil hai wahin ab meri jaan-e-na-tawan rakh do

KHuda kahlao ya kuchh aur sab kuchh mujh ko kahna hai

idhar aao mere munh mein tumhin apni zaban rakh do

wafa ka raaz is majmea mein khola ja nahin sakta

siwa mahshar ke koi aur roz-e-imtihan rakh do

mohabbat aur tasalli us pe hosh-e-zindagi 'kaifi'

nahin uThta agar kandhe se ye bar-e-garan rakh do