kaho maal-e-arzu ho kya agar ghuTe na dam

kaho ma.āl-e-ārzū ho kyā agar ghuTe na dam

ki apne iḳhtiyār meñ na arz-e-ġham na zabt-e-ġham

tirā kahīñ pata nahīñ uTheñ to kis taraf qadam

udhar baḌhūñ to but-kada idhar chalūñ to hai haram

mile the shaiḳh-o-barhaman fareb haiñ tirī qasam

use hī dhan ḳhudā ḳhudā use lagan sanam sanam

hazār kāvishoñ pe bhī hai zindagī rahīn-e-ġham

nafas nafas nazar nazar ravish ravish qadam qadam

ḳhirad kī baat pe na jā junūñ ke mai-kada meñ aa

yahāñ na rasm-e-pesh-o-pas na koī fikr-e-besh-o-kam

uThā na bār-e-bandagī ki mohtaram hai zindagī

dhaḌak rahā hai dil agar khanak rahā hai jām-e-jam

havā-e-shauq tham ga.ī havas kī mel jam ga.ī

kahāñ vo hashr aarzū na dil tapāñ na aañkh nam

yahī ḳhalish hai muttasil sar-e-chaman hadīs-e-dil

kaTīñ hazār uñgliyāñ kareñge ham yūñhī raqam

hai un se be-ta.alluqī na dostī na dushmanī

batāo 'hosh' kyā kareñ kahīñ ke ab rahe na ham

kaho maal-e-arzu ho kya agar ghuTe na dam

ki apne iKHtiyar mein na arz-e-gham na zabt-e-gham

tera kahin pata nahin uThen to kis taraf qadam

udhar baDhun to but-kada idhar chalun to hai haram

mile the shaiKH-o-barhaman fareb hain teri qasam

use hi dhan KHuda KHuda use lagan sanam sanam

hazar kawishon pe bhi hai zindagi rahin-e-gham

nafas nafas nazar nazar rawish rawish qadam qadam

KHirad ki baat pe na ja junun ke mai-kada mein aa

yahan na rasm-e-pesh-o-pas na koi fikr-e-besh-o-kam

uTha na bar-e-bandagi ki mohtaram hai zindagi

dhaDak raha hai dil agar khanak raha hai jam-e-jam

hawa-e-shauq tham gai hawas ki mel jam gai

kahan wo hashr aarzu na dil tapan na aankh nam

yahi KHalish hai muttasil sar-e-chaman hadis-e-dil

kaTin hazar ungliyan karenge hum yunhi raqam

hai un se be-talluqi na dosti na dushmani

batao 'hosh' kya karen kahin ke ab rahe na hum