kaho tum apni tumhein kya mila jafa kar ke

kaho tum apnī tumheñ kyā milā jafā kar ke

hameñ to dard kī daulat milī vafā kar ke

hayāt terī hai aur tere kaam aa jaa.e

tirī Dagar pe chalā huuñ ye faisla kar ke

utar na aa.e zamāna muḳhālifat pe kahīñ

ki jā rahā huuñ kisī ko charāġh-pā kar ke

junūñ se tark-e-ta.alluq kā ye natīja hai

bhaTak rahā huuñ ḳhirad ko maiñ rahnumā kar ke

vajūd un kā hai ik daaġh rū-e-hastī par

jo baiTh jaate haiñ qismat kā aasrā kar ke

vo aadmī hai haqīqat meñ aadmī 'qāsid'

ḳhatā pe jis ko nadāmat bhī ho ḳhatā kar ke

kaho tum apni tumhein kya mila jafa kar ke

hamein to dard ki daulat mili wafa kar ke

hayat teri hai aur tere kaam aa jae

teri Dagar pe chala hun ye faisla kar ke

utar na aae zamana muKHalifat pe kahin

ki ja raha hun kisi ko charagh-pa kar ke

junun se tark-e-talluq ka ye natija hai

bhaTak raha hun KHirad ko main rahnuma kar ke

wajud un ka hai ek dagh ru-e-hasti par

jo baiTh jate hain qismat ka aasra kar ke

wo aadmi hai haqiqat mein aadmi 'qasid'

KHata pe jis ko nadamat bhi ho KHata kar ke