kahta na tha main ai dil tu us se ji laga na

kahtā na thā maiñ ai dil tū us se jī lagā na

us kā to kyā gayā ab terā hī jī gayā na

sau baar maiñ ne jhāñkā chilman se us ko lekin

itnā kahā na us ne kyā dekhtā hai aa na

maiñ ḳhuub ro chukā huuñ zālim bas aur mujh ko

āzurdagī kī bāteñ kah kah ke tū rulā na

jaate hī yaar ke tū kahtā thā mar rahūñgā

vaqt-e-vidā.a ai dil āḳhir tū mar gayā na

kal maiñ ne hañste hañste pūchhā ki koī dam yaañ

farmā.iye to maiñ bhī baiThā rahūñ ki yā na

tevrī chaḌhā ke bolā chal chal ḳhabar le apnī

jī lag rahā hai terā jīdhar tū apne jā na

kahtā na thā ki har dam us kī galī meñ mat jā

is baat kā ab āḳhir charchā 'hasan' huā na

kahta na tha main ai dil tu us se ji laga na

us ka to kya gaya ab tera hi ji gaya na

sau bar main ne jhanka chilman se us ko lekin

itna kaha na us ne kya dekhta hai aa na

main KHub ro chuka hun zalim bas aur mujh ko

aazurdagi ki baaten kah kah ke tu rula na

jate hi yar ke tu kahta tha mar rahunga

waqt-e-widaa ai dil aaKHir tu mar gaya na

kal main ne hanste hanste puchha ki koi dam yan

farmaiye to main bhi baiTha rahun ki ya na

tewri chaDha ke bola chal chal KHabar le apni

ji lag raha hai tera jidhar tu apne ja na

kahta na tha ki har dam us ki gali mein mat ja

is baat ka ab aaKHir charcha 'hasan' hua na