کہتے ہیں بے نیاز ہے ہر خشک و تر سے وہ

کہتے ہیں بے نیاز ہے ہر خشک و تر سے وہ

رشتہ اٹوٹ رکھتا ہے لیکن نظر سے وہ

پردے سے چھن رہی ہیں تجلی کی جھلکیاں

خود کو چھپا سکا نہ ہماری نظر سے وہ

راہ وفا میں ہم کو تجسس بنا رہا

ہر چند مطمئن رہا اپنے سفر سے وہ

پل میں بدلتے دیکھا ہے موسم بہار کا

محتاط بے سبب نہیں برگ و ثمر سے وہ

دستار رکھنا سر پہ مگر دیکھ بھال کر

بیزار ہو نہ جائے کہیں اپنے سر سے وہ

معبود ظاہری کو یقیں ہو نہ ہو مگر

واقف ہے خوب تر مرے عیب و ہنر سے وہ

کوثرؔ نگاہ شوق کی تاثیر دیکھنا

گزرے گا ایک روز یقیناً ادھر سے وہ