kahte hain dagh-e-ishq miTae na jaenge

kahte haiñ dāġh-e-ishq miTā.e na jā.eñge

jalte hue charāġh bujhā.e na jā.eñge

ye dil azal se teġh-e-sitam kā shikār hai

is dil ke tum se naaz uThā.e na jā.eñge

vaa.iz tujhe butoñ se ġharaz kyā ḳhudā se Dar

be-ghar hue to phir ye basā.e na jā.eñge

jab tak rahegī sham-e-mohabbat meñ raushnī

fānūs nafratoñ ke jalā.e na jā.eñge

aa hī ga.e haiñ ab jo tirī jalva-gāh tak

dil ko baġhair tuur banā.e na jā.eñge

āzurda ḳhātiroñ se kināra na kījiye

ye diip bujh ga.e to jalā.e na jā.eñge

naḳhvat se kushtagān-e-vafā ko na dekhiye

ye naqsh zindagī meñ miTā.e na jā.eñge

ye kyā ḳhabar thī tark-e-vafā par bhī vo hameñ

yuuñ yaad ā.eñge ki bhulā.e na jā.eñge

shikvoñ se ḳhatm hoñgī na aapas kī ranjisheñ

ye dasht bastiyoñ se miTā.e na jā.eñge

'afsūñ' tire vaqār-e-mohabbat kā zikr kyā

tere to naqsh-e-pā bhī miTā.e na jā.eñge

kahte hain dagh-e-ishq miTae na jaenge

jalte hue charagh bujhae na jaenge

ye dil azal se tegh-e-sitam ka shikar hai

is dil ke tum se naz uThae na jaenge

waiz tujhe buton se gharaz kya KHuda se Dar

be-ghar hue to phir ye basae na jaenge

jab tak rahegi sham-e-mohabbat mein raushni

fanus nafraton ke jalae na jaenge

aa hi gae hain ab jo teri jalwa-gah tak

dil ko baghair tur banae na jaenge

aazurda KHatiron se kinara na kijiye

ye dip bujh gae to jalae na jaenge

naKHwat se kushtagan-e-wafa ko na dekhiye

ye naqsh zindagi mein miTae na jaenge

ye kya KHabar thi tark-e-wafa par bhi wo hamein

yun yaad aaenge ki bhulae na jaenge

shikwon se KHatm hongi na aapas ki ranjishen

ye dasht bastiyon se miTae na jaenge

'afsun' tere waqar-e-mohabbat ka zikr kya

tere to naqsh-e-pa bhi miTae na jaenge