kahte hain yan ki mujh sa koi mah-jabin nahin

kahte haiñ yaañ ki mujh sā koī mah-jabīñ nahīñ''

pyāre jo ham se pūchho to yaañ kyā kahīñ nahīñ

tujh sā to koī husn meñ yaañ nāznīñ nahīñ

yuuñ nāznīñ bahut haiñ pa nāz-āfrīñ nahīñ

saaqī ko jaam dene meñ us ḳhush-nigah ko aah

har dam ishārateñ haiñ ki us ke ta.iiñ nahīñ

jab us nahīñ ke kahne se maane hai vo burā

aaphī phir us ko kahtā huuñ hañs kar nahīñ nahīñ

itnā to chheḌtā huuñ ki kahtā hai jab vo shoḳh

banda tū merā mol ḳharīdā nahīñ nahīñ

saaqī tujhe qasam hai diye jā mujhe tū jaam

yaañ dam meñ dam hai hotī nahīñ jab nahīñ nahīñ

pūchhe hai us se jab koī qatl-e-'nazīr' ko

kahtā hai ham ne maarā hai haañ haañ nahīñ nahīñ

kahte hain yan ki mujh sa koi mah-jabin nahin

pyare jo hum se puchho to yan kya kahin nahin

tujh sa to koi husn mein yan naznin nahin

yun naznin bahut hain pa naz-afrin nahin

saqi ko jam dene mein us KHush-nigah ko aah

har dam ishaaraten hain ki us ke tain nahin

jab us nahin ke kahne se mane hai wo bura

aaphi phir us ko kahta hun hans kar nahin nahin

itna to chheDta hun ki kahta hai jab wo shoKH

banda tu mera mol KHarida nahin nahin

saqi tujhe qasam hai diye ja mujhe tu jam

yan dam mein dam hai hoti nahin jab nahin nahin

puchhe hai us se jab koi qatl-e-'nazir' ko

kahta hai hum ne mara hai han han nahin nahin