kahte ho mujhko be-adab KHair main be-adab sahi

kahte ho mujh ko be-adab ḳhair maiñ be-adab sahī

tum se shikāyat-e-sitam jab na sahī to ab sahī

bazm-e-azā-e-dost meñ ġham na sahī tarab sahī

hañs na sako jo khul ke tum to ḳhanda-e-zer-e-lab sahī

jitnī hoñ mehrbāniyāñ rakhiye vo ġhair ke liye

aur sitam hoñ jis qadar mere liye vo sab sahī

mujh par agar karam nahīñ us kā mujhe alam nahīñ

koī na koī baat ho qahr sahī ġhazab sahī

lutf-e-karam na ho na ho kam hai vo kyā 'atā ho jo

kāvish-e-be-sabab sahī kulfat-e-be-talab sahī

shauq se kah ke bad-nasīb aap use pukāriye

naam 'rashīd' hai to ho aur bhī ik laqab sahī

kahte ho mujh ko be-adab KHair main be-adab sahi

tum se shikayat-e-sitam jab na sahi to ab sahi

bazm-e-aza-e-dost mein gham na sahi tarab sahi

hans na sako jo khul ke tum to KHanda-e-zer-e-lab sahi

jitni hon mehrbaniyan rakhiye wo ghair ke liye

aur sitam hon jis qadar mere liye wo sab sahi

mujh par agar karam nahin us ka mujhe alam nahin

koi na koi baat ho qahr sahi ghazab sahi

lutf-e-karam na ho na ho kam hai wo kya 'ata ho jo

kawish-e-be-sabab sahi kulfat-e-be-talab sahi

shauq se kah ke bad-nasib aap use pukariye

nam 'rashid' hai to ho aur bhi ek laqab sahi