kahte ho tumhein hasb-e-tamanna nahin milta

kahte ho tumheñ hasb-e-tamannā nahīñ miltā

kam daam lagāne se to saudā nahīñ miltā

vo dhuup haqīqat meñ koī dhuup nahīñ hai

jis se kisī insāñ ko pasīna nahīñ miltā

ġhurbat ne atā kī hai mujhe ilm kī daulat

maktab nahīñ jaatā jo vazīfa nahīñ miltā

sab mansab-e-farhād hai teshe ke sabab se

varna ye use ishq meñ rutba nahīñ miltā

badnām-e-zamāna huuñ maiñ sachchā.ī kī ḳhātir

ab to mire bachche ko bhī rishta nahīñ miltā

allāh ġhanī hai vo jise chāhe navāze

mehnat se har ik shaḳhs ko paisa nahīñ miltā

kahte ho tumhein hasb-e-tamanna nahin milta

kam dam lagane se to sauda nahin milta

wo dhup haqiqat mein koi dhup nahin hai

jis se kisi insan ko pasina nahin milta

ghurbat ne ata ki hai mujhe ilm ki daulat

maktab nahin jata jo wazifa nahin milta

sab mansab-e-farhad hai teshe ke sabab se

warna ye use ishq mein rutba nahin milta

badnam-e-zamana hun main sachchai ki KHatir

ab to mere bachche ko bhi rishta nahin milta

allah ghani hai wo jise chahe nawaze

mehnat se har ek shaKHs ko paisa nahin milta