کہتے ہو تمہیں حسب تمنا نہیں ملتا

کہتے ہو تمہیں حسب تمنا نہیں ملتا

کم دام لگانے سے تو سودا نہیں ملتا

وہ دھوپ حقیقت میں کوئی دھوپ نہیں ہے

جس سے کسی انساں کو پسینہ نہیں ملتا

غربت نے عطا کی ہے مجھے علم کی دولت

مکتب نہیں جاتا جو وظیفہ نہیں ملتا

سب منصب فرہاد ہے تیشے کے سبب سے

ورنہ یہ اسے عشق میں رتبہ نہیں ملتا

بد نام زمانہ ہوں میں سچائی کی خاطر

اب تو مرے بچے کو بھی رشتہ نہیں ملتا

اللہ غنی ہے وہ جسے چاہے نوازے

محنت سے ہر اک شخص کو پیسہ نہیں ملتا