kahun bhi to kahun is ke siwa kya

kahūñ bhī to kahūñ is ke sivā kyā

ki maiñ kyā aur merā mudda.ā kyā

tirī mahfil se ai rashk-e-masīhā

ġham-e-dil ke sivā dil ko milā kyā

tire dāman meñ daulat do-jahāñ kī

mire dāman meñ dāman ke sivā kyā

gulistāñ hajla-e-ġham ban gayā hai

urūs-e-lāla-o-gul kā patā kyā

sar-e-sāhil charāġhāñ ho rahā hai

safīna phir bhañvar meñ aa gayā kyā

tumhārī shān-e-istiġhnā salāmat

mire hāl-e-zabūñ kā pūchhnā kyā

ḳhumār-āgīñ nazar maġhmūm chehra

kahīñ jām-e-mohabbat pī liyā kyā

tamannāoñ kā merī ḳhuun kar ke

tumheñ jān-e-tamannā mil gayā kyā

kahun bhi to kahun is ke siwa kya

ki main kya aur mera muddaa kya

teri mahfil se ai rashk-e-masiha

gham-e-dil ke siwa dil ko mila kya

tere daman mein daulat do-jahan ki

mere daman mein daman ke siwa kya

gulistan hajla-e-gham ban gaya hai

urus-e-lala-o-gul ka pata kya

sar-e-sahil charaghan ho raha hai

safina phir bhanwar mein aa gaya kya

tumhaari shan-e-istighna salamat

mere haal-e-zabun ka puchhna kya

KHumar-agin nazar maghmum chehra

kahin jam-e-mohabbat pi liya kya

tamannaon ka meri KHun kar ke

tumhein jaan-e-tamanna mil gaya kya