kaif-e-masti mein ajab jalwa-e-yaktai tha

kaif-e-mastī meñ ajab jalva-e-yaktā.ī thā

tū hī tū thā na tamāshā na tamāshā.ī thā

husn be-vāsta-e-zauq-e-ḳhud-ārā.ī thā

ishq be-vāhima-e-lazzat-e-rusvā.ī thā

terī hastī meñ na kasrat thī na vahdat paidā

hama o be-hama o bā-hama yakjā.ī thā

parda-dar koī na thā aur na dar-parda koī

ġhairat-e-ishq na thī ālam-e-tanhā.ī thā

lā-fanā terī sifat thī terī hastī kā subūt

be-nishāñ terā nishāñ sūrat-e-bīnā.ī thā

haal thā haal na maazī thā na thā mustaqbil

az-azal tā-ba-abad jalva-ba-ra.anā.ī thā

zaat qaa.em thī ba-zāt aur sifat thī ma.adūm

kun na thā ma.arka-e-anjuman-ārā.ī thā

bazm meñ tū ne jo ulTā ruḳh-e-raushan se naqāb

ek aalam tere jalve kā tamāshā.ī thā

fitna-zā husn huā ishq huā shor-e-fagan

ram huā shauq-fazā shauq tamannā.ī thā

koī sābit koī sayyāra koī mutahayyar

koī āshiq koī majnūñ koī saudā.ī thā

harf aur saut meñ aatā hai kisī kā ho kalām

'sāhir' āġhāz meñ kun ġhāyat-e-paidā.ī thā

kaif-e-masti mein ajab jalwa-e-yaktai tha

tu hi tu tha na tamasha na tamashai tha

husn be-wasta-e-zauq-e-KHud-arai tha

ishq be-wahima-e-lazzat-e-ruswai tha

teri hasti mein na kasrat thi na wahdat paida

hama o be-hama o ba-hama yakjai tha

parda-dar koi na tha aur na dar-parda koi

ghairat-e-ishq na thi aalam-e-tanhai tha

la-fana teri sifat thi teri hasti ka subut

be-nishan tera nishan surat-e-binai tha

haal tha haal na mazi tha na tha mustaqbil

az-azal ta-ba-abad jalwa-ba-ranai tha

zat qaem thi ba-zat aur sifat thi madum

kun na tha marka-e-anjuman-arai tha

bazm mein tu ne jo ulTa ruKH-e-raushan se naqab

ek aalam tere jalwe ka tamashai tha

fitna-za husn hua ishq hua shor-e-fagan

ram hua shauq-faza shauq tamannai tha

koi sabit koi sayyara koi mutahayyar

koi aashiq koi majnun koi saudai tha

harf aur saut mein aata hai kisi ka ho kalam

'sahir' aaghaz mein kun ghayat-e-paidai tha