kaif jo ruh pe tari hai tujhe kya malum

kaif jo ruuh pe taarī hai tujhe kyā mālūm

umr āñkhoñ meñ guzārī hai tujhe kyā mālūm

nigah-e-avval-e-bebāk ne mere dil par

terī tasvīr utārī hai tujhe kyā mālūm

mehr yā qahr tire chāhne vaale ke liye

har adā jaan se pyārī hai tujhe kyā mālūm

vaqt kaTtā hī nahīñ sub.h-e-masarrat aa jā

raat bīmār pe bhārī hai tujhe kyā mālūm

ek muddat se yahāñ umr-e-ravāñ tere baġhair

vaqf-e-ālām-shumārī hai tujhe kyā mālūm

ḳhanda-zan sūrat-e-gul dāman-e-sad-chāk mirā

parcham-e-fasl-e-bahārī hai tujhe kyā mālūm

gul-e-nau-ḳhāsta kāñToñ ko haqārat se na dekh

kis kī taqdīr meñ ḳhvārī hai tujhe kyā mālūm

'vajd' nā-paidi-e-ehsās-e-masarrat kā sabab

ādat-e-girya-o-zārī hai tujhe kyā mālūm

kaif jo ruh pe tari hai tujhe kya malum

umr aankhon mein guzari hai tujhe kya malum

nigah-e-awwal-e-bebak ne mere dil par

teri taswir utari hai tujhe kya malum

mehr ya qahr tere chahne wale ke liye

har ada jaan se pyari hai tujhe kya malum

waqt kaTta hi nahin subh-e-masarrat aa ja

raat bimar pe bhaari hai tujhe kya malum

ek muddat se yahan umr-e-rawan tere baghair

waqf-e-alam-shumari hai tujhe kya malum

KHanda-zan surat-e-gul daman-e-sad-chaak mera

parcham-e-fasl-e-bahaari hai tujhe kya malum

gul-e-nau-KHasta kanTon ko haqarat se na dekh

kis ki taqdir mein KHwari hai tujhe kya malum

'wajd' na-paidi-e-ehsas-e-masarrat ka sabab

aadat-e-girya-o-zari hai tujhe kya malum