کیف نصیب اب کہاں غنچوں کے بھی جمال میں

کیف نصیب اب کہاں غنچوں کے بھی جمال میں

کس نے یہ رنگ بھر دیا سادگیٔ خیال میں

قطرۂ شبنم حیا غنچہ و گل عرق عرق

کیا کیا سمٹ کے آ گیا دامن انفعال میں

جرأت اضطراب دل تو نے بتا یہ کیا کیا

ان کی بھی بات آ گئی کوشش عرض حال میں

کیسی حدیث رنگ و بو ذکر جمال و نور کیا

حسن ہی جب نہ آ سکا دائرۂ خیال میں

عشق ہی خود ہے اک جہاں رسم قیود سے الگ

عشق سی کوئی شے نہیں دامن ماہ و سال میں

نشتر غم سے کم نہیں میری اثر پذیریاں

دیر لگے گی اب ذرا زخم کے اندمال میں

جان حزیں نہیں فقط محو فغان آرزو

روندا ہوا سا دل بھی ہے حسرت پائمال میں

ہجر و وصال و رنج و غم حسرت و یاس و آرزو

ہر شے ابھر کے آ گئی مبہم سے اک سوال میں