kaif nasib ab kahan ghunchon ke bhi jamal mein

kaif nasīb ab kahāñ ġhunchoñ ke bhī jamāl meñ

kis ne ye rañg bhar diyā sādgī-e-ḳhayāl meñ

qatra-e-shabnam-e-hayā ġhuncha-o-gul araq araq

kyā kyā simaT ke aa gayā dāman-e-infi.āl meñ

jur.at-e-iztirāb-e-dil tū ne batā ye kyā kiyā

un kī bhī baat aa ga.ī koshish-e-arz-e-hāl meñ

kaisī hadīsh-e-rañg-o-bū zikr-e-jamāl-o-nūr kyā

husn hī jab na aa sakā dā.ira-e-ḳhyāl meñ

ishq hī ḳhud hai ik jahāñ rasm-e-quyūd se alag

ishq sī koī shai nahīñ dāman-e-māh-o-sāl meñ

nashtar-e-ġham se kam nahīñ merī asar-pazīriyāñ

der lagegī ab zarā zaḳhm ke indimāl meñ

jān-e-hazīñ nahīñ faqat mahv-e-fuġhān-e-ārzū

rauñdā huā sā dil bhī hai hasrat-e-pā.emāl meñ

hijr-o-visāl-o-ranj-o-ġham hasrat-o-yās-o-ārzū

har shai ubhar ke aa ga.ī mub.ham se ik savāl meñ

kaif nasib ab kahan ghunchon ke bhi jamal mein

kis ne ye rang bhar diya sadgi-e-KHayal mein

qatra-e-shabnam-e-haya ghuncha-o-gul araq araq

kya kya simaT ke aa gaya daman-e-infial mein

jurat-e-iztirab-e-dil tu ne bata ye kya kiya

un ki bhi baat aa gai koshish-e-arz-e-haal mein

kaisi hadish-e-rang-o-bu zikr-e-jamal-o-nur kya

husn hi jab na aa saka daira-e-KHyal mein

ishq hi KHud hai ek jahan rasm-e-quyud se alag

ishq si koi shai nahin daman-e-mah-o-sal mein

nashtar-e-gham se kam nahin meri asar-paziriyan

der lagegi ab zara zaKHm ke indimal mein

jaan-e-hazin nahin faqat mahw-e-fughan-e-arzu

raunda hua sa dil bhi hai hasrat-e-paemal mein

hijr-o-visal-o-ranj-o-gham hasrat-o-yas-o-arzu

har shai ubhar ke aa gai mubham se ek sawal mein