kaif sa ab ho gaya paida gham-e-‘ayyam mein

kaif sā ab ho gayā paidā ġham-e-‘ayyām meñ

kyā tilism-e-sarḳhushī hai daur-e-sub.h-o-shām meñ

ḳhud-farebī ke sahāre zindagī kaTtī rahī

aasrā miltā rahā dil ko umīd-e-ḳhām meñ

zindagī kī 'ārzī ḳhushiyoñ pe ham marte nahīñ

ham ko jiinā aa gayā daur-e-ġham-o-ālām meñ

ik ishāra chāhiye saaqī kī chashm-e-mast ka

donoñ 'ālam ko Dubo saktā huuñ apne jaam meñ

allah allāh merī chashm-e-shauq kī yak-bīniyāñ

ek tum hī tum nazar aate ho bazm-e-‘ām meñ

raqs kartā hai tirī āñkhoñ meñ yuuñ josh-e-shabāb

kaif jaise jhūmtā hai bāda-e-gulfām meñ

zindagī meñ is qadar rusvā hue 'farhat' ki ab

parda-poshī DhūñDte haiñ maut ke paiġhām meñ

kaif sa ab ho gaya paida gham-e-‘ayyam mein

kya tilism-e-sarKHushi hai daur-e-subh-o-sham mein

KHud-farebi ke sahaare zindagi kaTti rahi

aasra milta raha dil ko umid-e-KHam mein

zindagi ki 'arzi KHushiyon pe hum marte nahin

hum ko jina aa gaya daur-e-gham-o-alam mein

ek ishaara chahiye saqi ki chashm-e-mast ka

donon 'alam ko Dubo sakta hun apne jam mein

allah allah meri chashm-e-shauq ki yak-biniyan

ek tum hi tum nazar aate ho bazm-e-‘am mein

raqs karta hai teri aankhon mein yun josh-e-shabab

kaif jaise jhumta hai baada-e-gulfam mein

zindagi mein is qadar ruswa hue 'farhat' ki ab

parda-poshi DhunDte hain maut ke paigham mein