kaifiyyat aisi hai nigah-e-mast-e-KHwab mein

kaifiyyat aisī hai nigah-e-mast-e-ḳhvāb meñ

zāhid bhī dekh le to nahāve sharāb meñ

kyoñ kyā kaheñge hazrat-e-yūsuf javāb meñ

chorī kiyā hai dil jo zuleḳhā kā ḳhvāb meñ

hoñToñ ko tar to karte ho qadh-e-sharāb meñ

aisā na ho ki aag lage āftāb meñ

hai josh-e-girya ab bhī vo chashm-e-pur-āb meñ

dariyā ke dam ko band kiyā hai habāb meñ

likkhā hai āshiqoñ ne ye dil kī kitāb meñ

haiñ pand man.a sunñe mohabbat ke baab meñ

chīñ-bar-jabīñ ho kis kā paḌā aks aab meñ

is tarah mauj-e-bahr jo hai pech-o-tāb meñ

bū aur maza vo hai tire muñh ke luaab meñ

goyā ghulā hai qand-e-mukarrar gulāb meñ

shāyad ki azm-e-kūcha-e-jānāñ hai dil ko aaj

bhejā hai pahle jaan ko jo pā-turāb meñ

gardish hai us kī chashm ko hastī meñ yā kahīñ

nargis kā phuul tair rahā hai sharāb meñ

apnā to vaqt yaad karo tum ne shaiḳh jī

kyā kyā maze uḌaa.e haiñ ahd-e-shabāb meñ

suntā hai ham-nashīñ nigah-e-nāz be-tarah

ghar kar ga.ī hai is dil-e-ḳhāna-ḳharāb meñ

chechak ke daaġh us ruḳh-e-tābāñ pe dekh lo

taare khile na dekhe hoñ gar āftāb meñ

mat ġhusl diijo dast-e-hinā.ī kā huuñ shahīd

nahlā chukā hai dashna mujhe ḳhūn-e-nāb meñ

le chakh to shoḳhī-e-lab-o-namkīnī-e-zaqan

kyā ḳhuub nuun mirch haiñ dil ke kabāb meñ

us kī sī kuchh yahīñ nahīñ kahte haiñ dād-gar

sab mil ke vaañ bhī cheñd kareñge hisāb meñ

ab yaañ se ka.abe ḳhaak uḌāne chale haiñ shaiḳh

bahr-e-savāb ḳhaak paḌe is savāb meñ

bāteñ sunā sunā ke Darā.eñge apne saath

zāhid na sāniyo tū kisī ko azaab meñ

miltā nahīñ kuchh aur gar ai chārāgar tujhe

lāchār kuchh to chain paḌe iztirāb meñ

zaḳhmoñ pe dil ke sūda-e-almās hī chhiḌak

hal kar ke ho so ho namak-o-mushk-e-nāb meñ

zabt-e-fuġhāñ meñ Dar hai mujhe 'aish' dil kahīñ

siine se bāhar aa na paḌe iztirāb meñ

kaifiyyat aisi hai nigah-e-mast-e-KHwab mein

zahid bhi dekh le to nahawe sharab mein

kyon kya kahenge hazrat-e-yusuf jawab mein

chori kiya hai dil jo zuleKHa ka KHwab mein

honTon ko tar to karte ho qadh-e-sharab mein

aisa na ho ki aag lage aaftab mein

hai josh-e-girya ab bhi wo chashm-e-pur-ab mein

dariya ke dam ko band kiya hai habab mein

likkha hai aashiqon ne ye dil ki kitab mein

hain pand mana sunne mohabbat ke bab mein

chin-bar-jabin ho kis ka paDa aks aab mein

is tarah mauj-e-bahr jo hai pech-o-tab mein

bu aur maza wo hai tere munh ke luab mein

goya ghula hai qand-e-mukarrar gulab mein

shayad ki azm-e-kucha-e-jaanan hai dil ko aaj

bheja hai pahle jaan ko jo pa-turab mein

gardish hai us ki chashm ko hasti mein ya kahin

nargis ka phul tair raha hai sharab mein

apna to waqt yaad karo tum ne shaiKH ji

kya kya maze uDae hain ahd-e-shabab mein

sunta hai ham-nashin nigah-e-naz be-tarah

ghar kar gai hai is dil-e-KHana-KHarab mein

chechak ke dagh us ruKH-e-taban pe dekh lo

tare khile na dekhe hon gar aaftab mein

mat ghusl dijo dast-e-hinai ka hun shahid

nahla chuka hai dashna mujhe KHun-e-nab mein

le chakh to shoKHi-e-lab-o-namkini-e-zaqan

kya KHub nun mirch hain dil ke kabab mein

us ki si kuchh yahin nahin kahte hain dad-gar

sab mil ke wan bhi chend karenge hisab mein

ab yan se kabe KHak uDane chale hain shaiKH

bahr-e-sawab KHak paDe is sawab mein

baaten suna suna ke Daraenge apne sath

zahid na saniyo tu kisi ko azab mein

milta nahin kuchh aur gar ai chaaragar tujhe

lachaar kuchh to chain paDe iztirab mein

zaKHmon pe dil ke suda-e-almas hi chhiDak

hal kar ke ho so ho namak-o-mushk-e-nab mein

zabt-e-fughan mein Dar hai mujhe 'aish' dil kahin

sine se bahar aa na paDe iztirab mein