kai dinon tak jab apne kamre se hum na nikle to log samjhe

ka.ī dinoñ tak jab apne kamre se ham na nikle to log samjhe

kabhī kisī ko bahut satāte haiñ ye ujāle to log samjhe

badal ga.e jab kisī kī ġhurbat meñ aaj raste to log samjhe

thā jaanā schōl kaam par kyoñ ga.e vo bachche to log samjhe

hadaf pe muñh-zor āñdhiy.oñ ke faqat hamāre charāġh kab the

bikhar ga.e jab kisī gharauñde ke saare tinke to log samjhe

koī na maanā karāhateñ jab batā rahī thiiñ ki vaqt kam hai

jab un ke kāñdhoñ pe āḳhirī ham safar ko nikle to log samjhe

jo vaqt par hī na kaam aa.eñ to dost kyā haiñ aziiz kyā haiñ

kisī dukāñ par nahīñ chale jab ye khoTe sikke to log samjhe

haiñ bhiiḌ meñ bhī ham aaj tanhā ye ajnabiyyat kī dhuñdh kyā hai

uḌe dhueñ meñ na.e ta.alluq purāne rishte to log samjhe

jise samajhte haiñ shā.irī ham safar musalsal hai ḳhushbuoñ kā

ġhazal kī shāḳhoñ pe ḳhūbsūrat jo sher mahke to log samjhe

na diin par haiñ amal hamāre na fikr koī samāj kī hai

tarah tarah ke jab aaj ham par azaab utre to log samjhe

ġham-o-ḳhushī bhī to ik nasha hai sañbhalnā āsāñ nahīñ hai 'ḳhālid'

binā piye bhī qadam hamāre jo aaj bahke to log samjhe

kai dinon tak jab apne kamre se hum na nikle to log samjhe

kabhi kisi ko bahut satate hain ye ujale to log samjhe

badal gae jab kisi ki ghurbat mein aaj raste to log samjhe

tha jaana school kaam par kyon gae wo bachche to log samjhe

hadaf pe munh-zor aandhiyon ke faqat hamare charagh kab the

bikhar gae jab kisi gharaunde ke sare tinke to log samjhe

koi na mana karahaten jab bata rahi thin ki waqt kam hai

jab un ke kandhon pe aaKHiri hum safar ko nikle to log samjhe

jo waqt par hi na kaam aaen to dost kya hain aziz kya hain

kisi dukan par nahin chale jab ye khoTe sikke to log samjhe

hain bhiD mein bhi hum aaj tanha ye ajnabiyyat ki dhundh kya hai

uDe dhuen mein nae talluq purane rishte to log samjhe

jise samajhte hain shairi hum safar musalsal hai KHushbuon ka

ghazal ki shaKHon pe KHubsurat jo sher mahke to log samjhe

na din par hain amal hamare na fikr koi samaj ki hai

tarah tarah ke jab aaj hum par azab utre to log samjhe

gham-o-KHushi bhi to ek nasha hai sanbhalna aasan nahin hai 'KHalid'

bina piye bhi qadam hamare jo aaj bahke to log samjhe