kai silsilon se juDa hua ye jo zindagi ka safar raha

ka.ī silsiloñ se juḌā huā ye jo zindagī kā safar rahā

na.ī manziloñ kī talāsh meñ ye rahīn-e-rāh-guzar rahā

vo jo log mere ḳhulūs kā baḌā barmalā sā javāz the

jo nigāh-e-nāz kā zo.am the maiñ unhī kā sarf-e-nazar rahā

maiñ dayār-e-yār meñ ajnabī jahāñ umr saarī guzar ga.ī

jise maiñ ne apnā samajh liyā vo nagar jahān-e-digar rahā

kabhī sāz-e-ġham se jo sar mile to maiñ raqs-gāh meñ jal uThā

mire baḳht meñ thī jo naġhmagī maiñ usī ke zer-e-asar rahā

kisī aise ḳhauf meñ mubtalā ki bayāñ karūñ to karūñ bhī kyā

thī jo mumkināt se māvarā mujhe aisī baat kā Dar rahā

mirī aarzū koī ḳhvāb thā so maiñ rat-jagoñ se ulajh paḌā

mirī āfiyat thī ḳhumār meñ mujhe jāgne meñ hunar rahā

sabhī guftugū kā ma.aal hai na savāl kar na javāb de

yahāñ shor-o-ġhul ke bahāv meñ jise chup lagī vo amar rahā

kai silsilon se juDa hua ye jo zindagi ka safar raha

nai manzilon ki talash mein ye rahin-e-rah-guzar raha

wo jo log mere KHulus ka baDa barmala sa jawaz the

jo nigah-e-naz ka zoam the main unhi ka sarf-e-nazar raha

main dayar-e-yar mein ajnabi jahan umr sari guzar gai

jise main ne apna samajh liya wo nagar jahan-e-digar raha

kabhi saz-e-gham se jo sar mile to main raqs-gah mein jal uTha

mere baKHt mein thi jo naghmagi main usi ke zer-e-asar raha

kisi aise KHauf mein mubtala ki bayan karun to karun bhi kya

thi jo mumkinat se mawara mujhe aisi baat ka Dar raha

meri aarzu koi KHwab tha so main rat-jagon se ulajh paDa

meri aafiyat thi KHumar mein mujhe jagne mein hunar raha

sabhi guftugu ka maal hai na sawal kar na jawab de

yahan shor-o-ghul ke bahaw mein jise chup lagi wo amar raha