کئی طوفان دل و ذہن میں پالے ہوئے ہیں

کئی طوفان دل و ذہن میں پالے ہوئے ہیں

اور ایسے میں بھی ہم خود کو سنبھالے ہوئے ہیں

مشکلوں نے ہی جگائی ہے للک جینے کی

یوں سمجھیے کہ اندھیروں سے اجالے ہوئے ہیں

میں تری آنکھوں کے سب جھوٹ پکڑ سکتا ہوں

یہ محلے مرے اچھے سے کھنگالے ہوئے ہیں

کچھ دنوں سے نہیں آئی ہے مرے آنگن میں

دھوپ کے پاؤں میں لگتا ہے کہ چھالے ہوئے ہیں

اب جہاں چاہے ہمیں در بدری لے جائے

ہم وہ پنچھی ہیں جو پنجرے سے نکالے ہوئے ہیں