kaisa dil aur is ke kya gham ji

kaisā dil aur is ke kyā ġham jī

yūñhī bāteñ banāte haiñ ham jī

kyā bhalā āstīn aur dāman

kab se palkeñ bhī ab nahīñ nam jī

us se ab koī baat kyā karnā

ḳhud se bhī baat kiije kam-kam jī

dil jo dil kyā thā ek mahfil thā

ab hai darham jī aur barham jī

baat be-taur ho ga.ī shāyad

zaḳhm bhī ab nahīñ hai marham jī

haar duniyā se maan le shāyad

dil hamāre meñ ab nahīñ dam jī

hai ye hasrat ke zab.h ho jā.ūñ

hai shikan us shikam ki zālim jī

kaise āḳhir na rang kheleñ ham

dil lahū ho rahā hai jānam jī

hai ḳharāba husainiya apnā

roz majlis hai aur mātam jī

vaqt dam bhar kā khel hai is meñ

besh-az-besh hai kam-az-kam jī

hai azal se abad talak kā hisāb

aur bas ek pal hai paiham jī

be-shikan ho ga.ī haiñ vo zulfeñ

us galī meñ nahīñ rahe ḳham jī

dasht-e-dil kā ġhazāl hī na rahā

ab bhalā kis se kījiye ram jī

kaisa dil aur is ke kya gham ji

yunhi baaten banate hain hum ji

kya bhala aastin aur daman

kab se palken bhi ab nahin nam ji

us se ab koi baat kya karna

KHud se bhi baat kije kam-kam ji

dil jo dil kya tha ek mahfil tha

ab hai darham ji aur barham ji

baat be-taur ho gai shayad

zaKHm bhi ab nahin hai marham ji

haar duniya se man le shayad

dil hamare mein ab nahin dam ji

hai ye hasrat ke zabh ho jaun

hai shikan us shikam ki zalim ji

kaise aaKHir na rang khelen hum

dil lahu ho raha hai jaanam ji

hai KHaraba husainiya apna

roz majlis hai aur matam ji

waqt dam bhar ka khel hai is mein

besh-az-besh hai kam-az-kam ji

hai azal se abad talak ka hisab

aur bas ek pal hai paiham ji

be-shikan ho gai hain wo zulfen

us gali mein nahin rahe KHam ji

dasht-e-dil ka ghazal hi na raha

ab bhala kis se kijiye ram ji