kaisa makan saya-e-diwar bhi nahin

kaisā makān sāya-e-dīvār bhī nahīñ

jiite haiñ zindagī se magar pyaar bhī nahīñ

uThtī nahīñ hai ham pe koī mehrbāñ nigāh

kahne ko shahr mahfil-e-aġhyār bhī nahīñ

guzrī hai yuuñ to dasht meñ tanhā.iyoñ ke umr

dil be-niyāz-e-kūcha-o-bāzār bhī nahīñ

ruk ruk ke chal rahe haiñ ki manzil nahīñ koī

har kūcha varna kūcha-e-dildār bhī nahīñ

aage baḌhā.iye to qadam aap 'ja.afarī'

duniyā ab aisī vādī-e-pur-ḳhār bhī nahīñ

kaisa makan saya-e-diwar bhi nahin

jite hain zindagi se magar pyar bhi nahin

uThti nahin hai hum pe koi mehrban nigah

kahne ko shahr mahfil-e-aghyar bhi nahin

guzri hai yun to dasht mein tanhaiyon ke umr

dil be-niyaz-e-kucha-o-bazar bhi nahin

ruk ruk ke chal rahe hain ki manzil nahin koi

har kucha warna kucha-e-dildar bhi nahin

aage baDhaiye to qadam aap 'jafari'

duniya ab aisi wadi-e-pur-KHar bhi nahin