kaisa manzar tha ki kuchh tufan sa tha ek bar

kaisā manzar thā ki kuchh tūfān sā thā ek baar

chhīn kar tujh se maiñ dil ko le gayā thā ek baar

ye mirī ḳhush-qismatī thī bach gayā thā bāl-bāl

nafratoñ kā mujh pe bhī patthar girā thā ek baar

khulte hoñToñ par guloñ ke chhā ga.ī pazhmurdagī

kyā sabā ne dard kā tohfa diyā thā ek baar

aur kyā mujh ko tirī dahlīz se hāsil huā

kāġhzī ḳhushiyoñ kā guldasta milā thā ek baar

āsmāñ se gir paḌā andhī zamīñ ke jism par

be-tahāshā shauq kā taa.ir uḌā thā ek baar

maiñ havā-e-hijr kī tāsīr se huuñ bā-ḳhabar

bahr-e-āzam bhī laraz kar chīḳh uThā thā ek baar

kaisa manzar tha ki kuchh tufan sa tha ek bar

chhin kar tujh se main dil ko le gaya tha ek bar

ye meri KHush-qismati thi bach gaya tha baal-baal

nafraton ka mujh pe bhi patthar gira tha ek bar

khulte honTon par gulon ke chha gai pazhmurdagi

kya saba ne dard ka tohfa diya tha ek bar

aur kya mujh ko teri dahliz se hasil hua

kaghzi KHushiyon ka guldasta mila tha ek bar

aasman se gir paDa andhi zamin ke jism par

be-tahasha shauq ka tair uDa tha ek bar

main hawa-e-hijr ki tasir se hun ba-KHabar

bahr-e-azam bhi laraz kar chiKH uTha tha ek bar