kaise banaun hath pe taswir KHwab ki

kaise banā.ūñ haath pe tasvīr ḳhvāb kī

mujh ko milī na aaj bhī ta.abīr ḳhvāb kī

āñkhoñ se niiñd ruuTh ke jaane kidhar ga.ī

kaTtī nahīñ hai raat ko zanjīr ḳhvāb kī

jis shahr meñ ho ḳhvāb churāne kī vārdāt

kaise karūñ vahāñ pe maiñ tash.hīr ḳhvāb kī

ḳhvāboñ ne har qadam pe mujhe hausla diyā

dekhī nahīñ hai tum ne kyā tāsīr ḳhvāb kī

kab tak rahegī tīrgī tere ḳhayāl meñ

raushan karegī us ko bhī tanvīr ḳhvāb kī

us din to mere ḳhvāboñ ko pahchān jāoge

jis din likhegā koī bhī tafsīr ḳhvāb kī

ḳhvāboñ ko hī 'iram' ne asāsa banā liyā

rahne do mere paas ye jāgīr ḳhvāb kī

kaise banaun hath pe taswir KHwab ki

mujh ko mili na aaj bhi tabir KHwab ki

aankhon se nind ruTh ke jaane kidhar gai

kaTti nahin hai raat ko zanjir KHwab ki

jis shahr mein ho KHwab churane ki wardat

kaise karun wahan pe main tashhir KHwab ki

KHwabon ne har qadam pe mujhe hausla diya

dekhi nahin hai tum ne kya tasir KHwab ki

kab tak rahegi tirgi tere KHayal mein

raushan karegi us ko bhi tanwir KHwab ki

us din to mere KHwabon ko pahchan jaoge

jis din likhega koi bhi tafsir KHwab ki

KHwabon ko hi 'iram' ne asasa bana liya

rahne do mere pas ye jagir KHwab ki