کیسے بتاؤں اب مجھے کیا کیا نہیں پسند

کیسے بتاؤں اب مجھے کیا کیا نہیں پسند

بس تو پسند ہے کوئی تجھ سا نہیں پسند

نیندیں اڑا گئے جو ان آنکھوں کے خواب تھے

ایسا نہیں کہ اب مجھے سونا نہیں پسند

لوٹا کے جب سے آئیں ہیں کاپی وہ اس کی ہم

تب سے ہمیں تو اپنا ہی بستہ نہیں پسند

پہلے بنایا اس نے تو اپنی طرح مجھے

کہتا ہے اب کہ میں اسے ایسا نہیں پسند

جسموں کے رستے آ گئے ہیں دل تلک تو ہم

آساں بہت ہے پر ہمیں رستا نہیں پسند

پھر آپ ایسے دریا پے لعنت ہی بھیجئے

میری طرح کا گر اسے پیاسا نہیں پسند