کیسے بھلاؤں اس گل رنگیں ادا کو میں

کیسے بھلاؤں اس گل رنگیں ادا کو میں

کب تک فریب دوں دل درد آشنا کو میں

حسرت کو آرزو کو ترے مدعا کو میں

اے دل سمجھ رہا ہوں تری ہر ادا کو میں

تم چھپنا چاہتے ہو تو چھپ جاؤ شوق سے

لو ہاتھ اٹھا رہا ہوں بظاہر دعا کو میں

اے زندگی نہ جا یہ تماشہ بھی دیکھ لے

تیرے لیے گلے سے لگا لوں قضا کو میں

دل میرا اس کی جلوہ گہہ ناز ہے مگر

دیر و حرم میں ڈھونڈ رہا ہوں خدا کو میں

بخشا ہے جس کی یاد نے مجھ کو شعور غم

الزام دے رہا ہوں اسی پارسا کو میں

ہر سمت جس سے گیت برستے ہوں پیار کے

افگنؔ کہاں سے لاؤں گا ایسی فضا کو میں