kaise bhulaun us gul-e-rangin-ada ko main

kaise bhulā.ūñ us gul-e-rangīñ-adā ko maiñ

kab tak fareb duuñ dil-e-dard-āshnā ko maiñ

hasrat ko aarzū ko tire mudda'ā ko maiñ

ai dil samajh rahā huuñ tirī har adā ko maiñ

tum chhupnā chāhte ho to chhup jaao shauq se

lo haath uThā rahā huuñ bazāhir du'ā ko maiñ

ai zindagī na jā ye tamāsha bhī dekh le

tere liye gale se lagā luuñ qazā ko maiñ

dil merā us kī jalva-gah-e-nāz hai magar

dair-o-haram meñ DhūñD rahā huuñ ḳhudā ko maiñ

baḳhshā hai jis kī yaad ne mujh ko shu’ūr-e-ġham

ilzām de rahā huuñ usī pārsā ko maiñ

har samt jis se giit baraste hoñ pyaar ke

'afgan' kahāñ se lā.ūñgā aisī fazā ko maiñ

kaise bhulaun us gul-e-rangin-ada ko main

kab tak fareb dun dil-e-dard-ashna ko main

hasrat ko aarzu ko tere mudda'a ko main

ai dil samajh raha hun teri har ada ko main

tum chhupna chahte ho to chhup jao shauq se

lo hath uTha raha hun bazahir du'a ko main

ai zindagi na ja ye tamasha bhi dekh le

tere liye gale se laga lun qaza ko main

dil mera us ki jalwa-gah-e-naz hai magar

dair-o-haram mein DhunD raha hun KHuda ko main

baKHsha hai jis ki yaad ne mujh ko shu’ur-e-gham

ilzam de raha hun usi parsa ko main

har samt jis se git baraste hon pyar ke

'afgan' kahan se launga aisi faza ko main