kaise in sachche jazbon ki ab us tak tafhim karun

kaise in sachche jazboñ kī ab us tak tafhīm karūñ

rūThne vaalā ghar aa.e to lafzoñ meñ tarmīm karūñ

mujh se bichhaḌ kar jaane vaale itnā to samjhātā jā

apne aap ko do hissoñ meñ kaise maiñ taqsīm karūñ

ahl-e-siyāsat baañT rahe haiñ jaan se pyāre logoñ ko

maiñ shā.ir huuñ sach kahtā huuñ kyuuñ un kī tāzīm karūñ

vo bhī zamāna-sāz huā hai tum bhī Thiik hī kahte ho

merī bhī majbūrī samjho kis dil se taslīm karūñ

tujh se bichhaḌnā qismat meñ thā jiinā to majbūrī hai

soch rahā huuñ ujḌe ghar kī phir se na.ī tāzīm karūñ

koshish to kī laakh magar kuchh baat nahīñ bantī 'fārūq'

soch rahā huuñ saarā manzar lafzoñ meñ tajsīm karūñ

kaise in sachche jazbon ki ab us tak tafhim karun

ruThne wala ghar aae to lafzon mein tarmim karun

mujh se bichhaD kar jaane wale itna to samjhata ja

apne aap ko do hisson mein kaise main taqsim karun

ahl-e-siyasat banT rahe hain jaan se pyare logon ko

main shair hun sach kahta hun kyun un ki tazim karun

wo bhi zamana-saz hua hai tum bhi Thik hi kahte ho

meri bhi majburi samjho kis dil se taslim karun

tujh se bichhaDna qismat mein tha jina to majburi hai

soch raha hun ujDe ghar ki phir se nai tazim karun

koshish to ki lakh magar kuchh baat nahin banti 'faruq'

soch raha hun sara manzar lafzon mein tajsim karun