kaise insan hain hum riDh ki haDDi ke baghair

kaise insān haiñ ham riiḌh kī haDDī ke baġhair

liye phirtī haiñ havā.eñ hameñ marzī ke baġhair

Thiik aatā nahīñ mujh par koī duniyā kā libās

āsmāñ vaale mirī naap ke darzī ke baġhair

koī ‘attār davā hī nahīñ detā ham ko

ai tabīb-e-maraz-e-jāñ tirī parchī ke baġhair

maiñ vahī huuñ ki banā baiThā huuñ kohsār-e-vujūd

tū ne bhejā thā jise zarra-e-hastī ke baġhair

sāhil-e-'ishq se aage nahīñ jaane kā badan

paar karnā hai ye dariyā tumheñ kashtī ke baġhair

mujh pe khultā hī nahīñ husn mire hone kā

apne ā.īne se ik 'aks kī chorī ke baġhair

haq bhī bātil sā nazar aatā hai us mahfil meñ

kabhī nā-vaqt chalā jā.ūñ jo mastī ke baġhair

na rahā dasht to jiinā mirā nā-mumkin hai

zinda rahnā koī mushkil nahīñ bastī ke baġhair

zulm terā tirā ik tarz-e-mohabbat bhī to thā

ḳhush rahūñ kaise bhalā maiñ tirī saḳhtī ke baġhair

'farhat-ehsās' koī yūñhī nahīñ ho jaatā

arz-e-tanhā.ī meñ is taḳht-nashīnī ke baġhair

kaise insan hain hum riDh ki haDDi ke baghair

liye phirti hain hawaen hamein marzi ke baghair

Thik aata nahin mujh par koi duniya ka libas

aasman wale meri nap ke darzi ke baghair

koi ‘attar dawa hi nahin deta hum ko

ai tabib-e-maraz-e-jaan teri parchi ke baghair

main wahi hun ki bana baiTha hun kohsar-e-wujud

tu ne bheja tha jise zarra-e-hasti ke baghair

sahil-e-'ishq se aage nahin jaane ka badan

par karna hai ye dariya tumhein kashti ke baghair

mujh pe khulta hi nahin husn mere hone ka

apne aaine se ek 'aks ki chori ke baghair

haq bhi baatil sa nazar aata hai us mahfil mein

kabhi na-waqt chala jaun jo masti ke baghair

na raha dasht to jina mera na-mumkin hai

zinda rahna koi mushkil nahin basti ke baghair

zulm tera tera ek tarz-e-mohabbat bhi to tha

KHush rahun kaise bhala main teri saKHti ke baghair

'farhat-ehsas' koi yunhi nahin ho jata

arz-e-tanhai mein is taKHt-nashini ke baghair