kaise kaTenge shab-e-gham ko sahar hone tak

kaise kāTeñge shab-e-ġham ko sahar hone tak

ham pe kyā guzregī ye ma.arka sar hone tak

koī saudā-e-mohabbat kā ḳharīdār na thā

ghar ghar āvāra phirā hai mire sar hone tak

sar-e-saudā-zada zindāñ kī haqīqat kyā hai

dam na lenā kabhī dīvār ke dar hone tak

Dar kisī kā nahīñ saarī shab-e-ġham apnī hai

ḳhuub ro le dil-e-nākām sahar hone tak

jal gayā soz-e-mohabbat se mirā ḳhūn-e-jigar

is ko rahne na diyā la.al-o-gohar hone tak

āh-e-sozāñ se na.ī dasht meñ aa.ī hai bahār

dhuum thī ġhol kī tūfān-e-sharar hone tak

koī iḳhfā-e-ġham-e-ishq kī sūrat na rahī

aañsū bahte rahe dāman mirā tar hone tak

iztirāb-e-nigah-e-shauq huā māne-e-dīd

jalva poshīda rahā tāb-e-nazar hone tak

dānish-e-sirr-e-haqīqat thī isī par mauqūf

be-ḳhabar ho ga.e ham apnī ḳhabar hone tak

hai abhī se hameñ ādāb-e-mohabbat kā ḳhayāl

naam kar jā.eñge umar apnī basar hone tak

tum ko 'shākir' hai abas dād-e-suḳhan kī ummīd

kaun duniyā meñ rahe qadr-e-hunar hone tak

kaise kaTenge shab-e-gham ko sahar hone tak

hum pe kya guzregi ye marka sar hone tak

koi sauda-e-mohabbat ka KHaridar na tha

ghar ghar aawara phira hai mere sar hone tak

sar-e-sauda-zada zindan ki haqiqat kya hai

dam na lena kabhi diwar ke dar hone tak

Dar kisi ka nahin sari shab-e-gham apni hai

KHub ro le dil-e-nakaam sahar hone tak

jal gaya soz-e-mohabbat se mera KHun-e-jigar

is ko rahne na diya lal-o-gohar hone tak

aah-e-sozan se nai dasht mein aai hai bahaar

dhum thi ghol ki tufan-e-sharar hone tak

koi iKHfa-e-gham-e-ishq ki surat na rahi

aansu bahte rahe daman mera tar hone tak

iztirab-e-nigah-e-shauq hua mane-e-did

jalwa poshida raha tab-e-nazar hone tak

danish-e-sirr-e-haqiqat thi isi par mauquf

be-KHabar ho gae hum apni KHabar hone tak

hai abhi se hamein aadab-e-mohabbat ka KHayal

nam kar jaenge umar apni basar hone tak

tum ko 'shakir' hai abas dad-e-suKHan ki ummid

kaun duniya mein rahe qadr-e-hunar hone tak