kaise kabhi kisi ko dikhaega aaina

kaise kabhī kisī ko dikhā.egā ā.īna

jab ek dūsre ko laḌā.egā ā.īna

jis raushnī pe aks kā dār-o-madār hai

us raushnī ko kaun dikhā.egā ā.īna

fitrat meñ us kī nāz-ḳhirāmī nahīñ to phir

kyūñkar kisī ke naaz uThā.egā ā.īna

samjho ki aa.ine kā janāza nikal gayā

jis din amīr-e-shahr ko bhā.egā ā.īna

aisā nahīñ ki sirf sañvāregā shaḳhsiyat

ehsān bhī na tum pe jatā.egā ā.īna

pardā paḌā ho āñkhoñ pe mumkin to hai magar

mumkin nahīñ ki aib chhupā.egā ā.īna

kah do anā-parast se 'ahyā' ki jald hī

maiñ aur ham ke darmiyāñ aa.egā ā.īna

kaise kabhi kisi ko dikhaega aaina

jab ek dusre ko laDaega aaina

jis raushni pe aks ka dar-o-madar hai

us raushni ko kaun dikhaega aaina

fitrat mein us ki naz-KHirami nahin to phir

kyunkar kisi ke naz uThaega aaina

samjho ki aaine ka janaza nikal gaya

jis din amir-e-shahr ko bhaega aaina

aisa nahin ki sirf sanwarega shaKHsiyat

ehsan bhi na tum pe jataega aaina

parda paDa ho aankhon pe mumkin to hai magar

mumkin nahin ki aib chhupaega aaina

kah do ana-parast se 'ahya' ki jald hi

main aur hum ke darmiyan aaega aaina