کیسے کڑکتی دھوپ سے چھاؤں میں آ گیا

کیسے کڑکتی دھوپ سے چھاؤں میں آ گیا

میں سٹپٹا کے شہر سے گاؤں میں آ گیا

اب اس سے اگے اور تماشا بنوں گا کیا

میں جنگ جو تھا خواجہ سراؤں میں آ گیا

ایسے ہی جیسے چیز ہو کوئی گری پڑی

سورج کسی غریب کے پاؤں میں آ گیا

میری نہیں یہ میرے ستاروں کی چال تھی

صحرا نشین اٹھ کے خلاؤں میں آ گیا

پروردگار یہ تیری قدرت کا فیض ہے

تخلیق کا کمال بھی ماؤں میں آ گیا

کیا چھو لیا ہے اس نے ذرا سا گلاب کو

کھلتا ہوا گلاب اداؤں میں آ گیا

دل منہ کے بل گرا ہے یہی سوچ سوچ کر

سر تھا مگر دھڑام سے پاؤں میں آ گیا

جب تک تھا ایک رب کی رعیت میں خوش رہا

مسعودؔ پھر میں اتنے خداؤں میں آ گیا