kaise kahun ki aaKHiri apni uDan hai

kaise kahūñ ki āḳhirī apnī uḌaan hai

is āsmāñ ke ba.ad bhī ik āsmān hai

zaḳhmoñ se chuur chuur badan lab pe jaan hai

aise meñ hausloñ kā mire imtihān hai

allāh-re ye shahr-e-nigārāñ ye merā dil

kachchā ghaḌā hai aur nadī meñ ufaan hai

mahloñ meñ ho udaas to aa jaao lauT kar

merā vahīñ pe aaj bhī kachchā makān hai

tū ne diyā jo zaḳhm vo bhar to gayā magar

dil par hamāre aaj bhī us kā nishān hai

parcham hamāre azm kā ab bhī buland hai

allāh kā hai shukr vahī ān-bān hai

'tashna' tū mushkilāt se himmat na hārnā

be-shak ḳhudā-e-pāk baḌā mehrbān hai

kaise kahun ki aaKHiri apni uDan hai

is aasman ke baad bhi ek aasman hai

zaKHmon se chur chur badan lab pe jaan hai

aise mein hauslon ka mere imtihan hai

allah-re ye shahr-e-nigaran ye mera dil

kachcha ghaDa hai aur nadi mein ufan hai

mahlon mein ho udas to aa jao lauT kar

mera wahin pe aaj bhi kachcha makan hai

tu ne diya jo zaKHm wo bhar to gaya magar

dil par hamare aaj bhi us ka nishan hai

parcham hamare azm ka ab bhi buland hai

allah ka hai shukr wahi aan-ban hai

'tashna' tu mushkilat se himmat na haarna

be-shak KHuda-e-pak baDa mehrban hai