kaise kahun ki us ka karam mujh pe ab nahin

kaise kahūñ ki us kā karam mujh pe ab nahīñ

vo shaḳhs bevafā hai magar be-adab nahīñ

maiñ vo sahīfa-e-saharī huuñ mire aziiz

jis ke kisī varaq pe bhī tahrīr-e-shab nahīñ

niklā thā jab safar pe hazāroñ the saath meñ

manzil pe chand log hī pahuñche the sab nahīñ

Takrā ke mujh se chuur huiiñ saarī mushkileñ

ab koī hādisa bhī mubāraz-talab nahīñ

maiñ ne to un kī shaan meñ kuchh bhī nahīñ kahā

nārāzgī kā un kī koī bhī sabab nahīñ

maiñ ne charāġh rakh diye har ik fasīl par

arsa huā ki tīrgī shikva ba-lab nahīñ

kaise kahun ki us ka karam mujh pe ab nahin

wo shaKHs bewafa hai magar be-adab nahin

main wo sahifa-e-sahari hun mere aziz

jis ke kisi waraq pe bhi tahrir-e-shab nahin

nikla tha jab safar pe hazaron the sath mein

manzil pe chand log hi pahunche the sab nahin

Takra ke mujh se chur huin sari mushkilen

ab koi hadisa bhi mubaraz-talab nahin

main ne to un ki shan mein kuchh bhi nahin kaha

naraazgi ka un ki koi bhi sabab nahin

main ne charagh rakh diye har ek fasil par

arsa hua ki tirgi shikwa ba-lab nahin