کیسے کہوں کہ اس کا کرم مجھ پہ اب نہیں

کیسے کہوں کہ اس کا کرم مجھ پہ اب نہیں

وہ شخص بے وفا ہے مگر بے ادب نہیں

میں وہ صحیفۂ سحری ہوں مرے عزیز

جس کے کسی ورق پہ بھی تحریر شب نہیں

نکلا تھا جب سفر پہ ہزاروں تھے ساتھ میں

منزل پہ چند لوگ ہی پہنچے تھے سب نہیں

ٹکرا کے مجھ سے چور ہوئیں ساری مشکلیں

اب کوئی حادثہ بھی مبارز طلب نہیں

میں نے تو ان کی شان میں کچھ بھی نہیں کہا

ناراضگی کا ان کی کوئی بھی سبب نہیں

میں نے چراغ رکھ دئے ہر اک فصیل پر

عرصہ ہوا کہ تیرگی شکوہ بہ لب نہیں