kaise kaise sitam uThae hain

kaise kaise sitam uThā.e haiñ

zaḳhm khā kar bhī muskurā.e haiñ

ashk āñkhoñ meñ DabDabā.e haiñ

yā sitāre se jhilmilā.e haiñ

aap jab bhī chaman meñ aa.e haiñ

gul to gul ḳhaar muskurā.e haiñ

kyoñ na jaane ye dil meñ aatā hai

aap apne nahīñ parā.e haiñ

koī apnā mizāj-dāñ na milā

ham ne ḳhud apne naaz uThā.e haiñ

jinheñ ḳhāmoshiyoñ ne dohrāyā

ham ne vo giit gungunā.e haiñ

dīda-e-nīm-ḳhvāb shāhid hai

aap nīñdeñ churā ke laa.e haiñ

un par apnā gumān hotā hai

dīda-o-dil meñ yuuñ samā.e haiñ

pichhlī bātoñ kā zikr lā-hāsil

aaj insāñ kahāñ haiñ saa.e haiñ

raushnī lī na musta.ār kabhī

ḳhūn-e-dil se diye jalā.e haiñ

ḳhatm un par hai guftugū un kī

kuchh ishāre haiñ kuchh kinā.e haiñ

ham ne rangīnī-e-taḳhayyul se

kaise kaise chaman khilā.e haiñ

rahmat-e-haq ko josh aayā hai

jab bhī dast-e-duā uThā.e haiñ

ai ġham-e-ārzū tire hāthoñ

dil ne kyā kyā fareb khaa.e haiñ

aap rūTheñ magar ḳhayāl rahe

ham ne rūThe hue manā.e haiñ

ḳhair-maqdam kiyā hai yuuñ 'tālib'

un ke qadmoñ meñ dil bichhā.e haiñ

kaise kaise sitam uThae hain

zaKHm kha kar bhi muskurae hain

ashk aankhon mein DabDabae hain

ya sitare se jhilmilae hain

aap jab bhi chaman mein aae hain

gul to gul KHar muskurae hain

kyon na jaane ye dil mein aata hai

aap apne nahin parae hain

koi apna mizaj-dan na mila

hum ne KHud apne naz uThae hain

jinhen KHamoshiyon ne dohraya

hum ne wo git gungunae hain

dida-e-nim-KHwab shahid hai

aap ninden chura ke lae hain

un par apna guman hota hai

dida-o-dil mein yun samae hain

pichhli baaton ka zikr la-hasil

aaj insan kahan hain sae hain

raushni li na mustaar kabhi

KHun-e-dil se diye jalae hain

KHatm un par hai guftugu un ki

kuchh ishaare hain kuchh kinae hain

hum ne rangini-e-taKHayyul se

kaise kaise chaman khilae hain

rahmat-e-haq ko josh aaya hai

jab bhi dast-e-dua uThae hain

ai gham-e-arzu tere hathon

dil ne kya kya fareb khae hain

aap ruThen magar KHayal rahe

hum ne ruThe hue manae hain

KHair-maqdam kiya hai yun 'talib'

un ke qadmon mein dil bichhae hain