kaise kaTa ye shab ka safar dekhna bhi hai

kaise kaTā ye shab kā safar dekhnā bhī hai

bujhte diye ne vaqt-e-sahar dekhnā bhī hai

be-nām chāhatoñ kā asar dekhnā bhī hai

shāḳh-e-nazar pe husn-e-samar dekhnā bhī hai

ab ke use qarīb se chhūnā bhī hai zarūr

patthar hai aa.ina ki guhar dekhnā bhī hai

ye shahr chhoḌnā hai magar is se peshtar

us bevafā ko ek nazar dekhnā bhī hai

in āñsuoñ ke saath basārat hī bah na jaa.e

itnā na ro ai dīda-e-tar dekhnā bhī hai

mumkin nahīñ hai us ko lagātār dekhnā

ruk ruk ke us ko dekh agar dekhnā bhī hai

manzar hai dil-ḳharāsh magar dil kā kyā kareñ

go dekhnā nahīñ hai magar dekhnā bhī hai

is aas par khaḌe haiñ ki ik baar 'yūsufī'

us ne zarā palaT ke idhar dekhnā bhī hai

kaise kaTa ye shab ka safar dekhna bhi hai

bujhte diye ne waqt-e-sahar dekhna bhi hai

be-nam chahaton ka asar dekhna bhi hai

shaKH-e-nazar pe husn-e-samar dekhna bhi hai

ab ke use qarib se chhuna bhi hai zarur

patthar hai aaina ki guhar dekhna bhi hai

ye shahr chhoDna hai magar is se peshtar

us bewafa ko ek nazar dekhna bhi hai

in aansuon ke sath basarat hi bah na jae

itna na ro ai dida-e-tar dekhna bhi hai

mumkin nahin hai us ko lagatar dekhna

ruk ruk ke us ko dekh agar dekhna bhi hai

manzar hai dil-KHarash magar dil ka kya karen

go dekhna nahin hai magar dekhna bhi hai

is aas par khaDe hain ki ek bar 'yusufi'

us ne zara palaT ke idhar dekhna bhi hai