kaise meri ye KHamoshi ka sabab samjhenge

kaise merī ye ḳhamoshī kā sabab samjheñge

sune jaane kī to gūñge hī talab samjheñge

ye nahīñ samjheñge ik roz samajh aaya mujhe

maiñ samajhtā thā ki ab samjheñge ab samjheñge

ab ġhalat-fahmiyāñ dil paal rahā hai jānāñ

lab se Takrātī havā ko tire lab samjheñge

jeb ḳhālī hai to ik baat samajh aa.ī hai

jeb bharte hī mirī bātoñ ko sab samjheñge

kisī ik shaḳhs kī ḳhātir ye ġhazal likkhī hai

kaise ummīd karūñ DeḌh arab samjheñge

pahle shā'ir ne to bas dard likhā thā apnā

use mā'lūm na thā log adab samjheñge

farq ab bhuul ga.iiñ āñkheñ añdheroñ meñ jī

badlī aa.egī to ham us ko bhī shab samjheñge

kaise meri ye KHamoshi ka sabab samjhenge

sune jaane ki to gunge hi talab samjhenge

ye nahin samjhenge ek roz samajh aaya mujhe

main samajhta tha ki ab samjhenge ab samjhenge

ab ghalat-fahmiyan dil pal raha hai jaanan

lab se Takraati hawa ko tere lab samjhenge

jeb KHali hai to ek baat samajh aai hai

jeb bharte hi meri baaton ko sab samjhenge

kisi ek shaKHs ki KHatir ye ghazal likkhi hai

kaise ummid karun DeDh arab samjhenge

pahle sha'ir ne to bas dard likha tha apna

use ma'lum na tha log adab samjhenge

farq ab bhul gain aankhen andheron mein ji

badli aaegi to hum us ko bhi shab samjhenge