کیسے میری یہ خموشی کا سبب سمجھیں گے

کیسے میری یہ خموشی کا سبب سمجھیں گے

سنے جانے کی تو گونگے ہی طلب سمجھیں گے

یہ نہیں سمجھیں گے اک روز سمجھ آیا مجھے

میں سمجھتا تھا کہ اب سمجھیں گے اب سمجھیں گے

اب غلط فہمیاں دل پال رہا ہے جاناں

لب سے ٹکراتی ہوا کو ترے لب سمجھیں گے

جیب خالی ہے تو اک بات سمجھ آئی ہے

جیب بھرتے ہی مری باتوں کو سب سمجھیں گے

کسی اک شخص کی خاطر یہ غزل لکھی ہے

کیسے امید کروں ڈیڑھ عرب سمجھیں گے

پہلے شاعر نے تو بس درد لکھا تھا اپنا

اسے معلوم نہ تھا لوگ ادب سمجھیں گے

فرق اب بھول گئیں آنکھیں اندھیروں میں جی

بدلی آئے گی تو ہم اس کو بھی شب سمجھیں گے